Novos traballos

Luis Taboada

Na tertulia do escritor vigués Luis Taboada y Coca, autor da Historia cómica de España, acode un home sen oficio nin beneficio, pero con sona de meter no seu peto todo canto é de propiedade allea.

Unha tarde di a Taboada:

_Non sei se saberá que atopei traballo nos talleres do ferrocarril do Norte.

E Taboada replícalle de seguido:

_ Pois debo advertirlle que alí teñen as locomotoras contadas e á saída de talleres rexistran ao persoal.

0

O conto adxudícaselle a un novo republicano de Pontevedra. Novo no mesmo sentido de cando se di “novo rico”.

Este home quere facer carreira política no réxime e observa que todos os xerifaltes da República son laicos e de costumes afastadas da Igrexa, todo o contrario que a súa muller, unha asidua das sancristías.

_ Mira, Tomasa; ti podes seguir facendo a vida que che veña en gana, pero estando eu diante, esquécete dos santos e das novenas. De acordo?

E Tomasa acepta as condicións que lle esixe o seu marido. Todo sexa pola prosperidade familiar.

Un día reciben na súa casa a un matrimonio de xente xa ben posicionada cos que o marido pretende quedar moi ben pois serían decisivos para o seu ascenso.

En determinado momento, a muller da visita esbirra de xeito ben sonoro, e cando Tomasa xa está disposta a lle contestar coa fórmula acostumada de “Xesús!”, lembra as prevencións do seu home, e di:

_ Lerroux!

0

Polos anos cincuenta chegan aos comercios galegos modernísimos panos de cabeza asinados por Christian Dior. Nun escaparate informan do seu prezo: 470 pesetas.

Unha señora entra e pregunta:

_ O prezo que poñen é da ducia ou do cento?

Comenta